يعني إيه هدف يعني إيه طموح؟بقلم مصطفي علي دعبيس
يعني إيه هدف يعني إيه طموح
يعني إنت لسه عايش وجواك روح
يعني مهما كانت الأبواب مقفولة
عارف إن باب ربك لسه مفتوح
طموح يعني عندك إصرار
توصل مهما كانت الأخطار
هدفك دايما قدام عينيك
ما تعرفش هزيمة ولا إنكسار
أيوه بتقع وبتفشل عادي
ومين حاله ثابت في الدنيا دي
عمرها ما كانت علي نفس الوتيرة
ده بالنسبة لك استثناء مش اعتيادي
مهما يحاولوا يوقعوك
ويكسروا بخاطرك ويحبطوك
طول ما انت عايش بالأمل
عمرهم ما هيقدروا يكسروك
الكل عارف وانت بالذات
إن الحياة كلها جولات
يعني يوم لك ويوم عليك
فوق وتحت خد وهات
مش هينفع تستسلم للخوف
وترمي فشلك علي شماعة الظروف
بدأت طريقك ولازم تكمله
هتوصل أكيد وبكره هتشوف
صدقني طموحك هو الوقود
ده أجمل شيء في الوجود
هو ده اللي انت عايش عشانه
مخلوق لسبب انت عشانه موجود
هي الجنة بالنسبة لك إيه
مش ده طموح بتسعي إليه
القضية مش مجرد دنيا والسلام
الآخرة هدف ولازم تفكر فيه
طلع بقي المارد اللي جواك
والقدرات اللي خلقها فيك مولاك
يلا قوم وحقق إنجازاتك
أصل حلمك مش هيستناك
الموضوع محتاج شوية إرادة
و بالمرة تغيير كام عادة
هتتعب شوية بس افتكر
من أراد السيادة عليه بهجر الوسادة
ناس كتير تعبت عشان حلمها
برغم إن الدنيا كانت واقفة ضدها
اتحدوا الصعب وحققوا المستحيل
وبعلمهم استفادت البشرية كلها
خليك واحد منهم وحقق الأحلام
ما تبقاش واقف مكانك واطلع بقي لقدام
بإمكانك تنجح وتعمل معجزات
بكره تعرف إن خوفك كان مجرد أوهام
بكره راح تحتفل بنجاحك
وتنسي كل همومك وجراحك
وتعرف قيمة تعبك وتضحياتك
وإن طموحك كان هو سلاحك
