شريط العمر
مصطفي علي دعبيس
شريط العمربيعدي قدامنا
نبص عليه ونفتكر أيامنا
أيام الطفولة الجميلة البريئة
لعبنا وضحكنا وأفراحنا وأحزاننا
ونرجع نقول ازاي عدت الأيام
كانت حقيقة ولا مجرد أحلام
عدت سنين العمر وكبرنا
وصحينا وفوقنا من الأوهام
وتقعد مع نفسك وتسرح بخيالك
وتشوف وصلت لفين أحوالك
عدت سنين العمر قدام عينيك
ولسه قاعد تغني على موالك
بتحاول تضيع في أوقاتك
مش كنت حاولت تعوض اللي فاتك
وتتكلم مع ده وتتكلم مع التاني
مشيوا وسابوك أسير لذكرياتك
وكأن إحنا بقينا مش إحنا
واتغيرت كتير ملامحنا
وعدي العمر في غمضة عين
قبل ما الدنيا تفكر تصالحنا
ونبص لنفسنا جوه مراياتنا
ونحاول نسترجع ذكرياتنا
ونقول هو احنا كبرنا أمتي
ولا خلاص بقي القطر فاتنا
وتسأل نفسك أنا كنت فين
لما بسرعة عدت السنين
وياترى ايه هو رصيد أعمالك
وايه اتكتب في صحيفتك يا مسكين
وتقعد مع نفسك وتقول يا سلام
أما بصحيح دي كانت أيام
قضينا أجمل سنين العمر
وكل ده بقي مجرد كلام
أهم شيء قبل الرحيل
إنك تسيب أثر جميل
نرحل وتفضل السيرة الطيبة
باقية ولو بعد عمر طويل
