اكتب واتغلب علي أحزانكبقلم مصطفي علي دعبيس
كل ما بيزيد وجعي وألمي
أفتح كراستي وأمسك قلمي
وأكتب كل اللي جوايا
عشان أنسي جراحي وهمي
بالاقي نفسي في الكتابة
بتخرجني من جو الكآبة
سلاحي دايما في وحدتي
مشاعر صادقة مش كدابة
هي ترجمة الشعور والإحساس
وصاحبي الوفي لو خذلني كل الناس
بركان الإبداع اللي مالوش حدود
هي الحقيقة والصدق والإخلاص
هي عزة نفسي وكبريائي
في مواجهة خصومي وأعدائي
أصل كلامي بيوجع ضميرهم
كلام محسوب مش همجي وعشوائي
حريص إني أكتب بالأدب والأصول
حتي لو زعلان كلامي بالمعقول
الكتابة بالنسبة لي حدود ومبادىء
إساءة الأدب شيء مش مقبول
الكتابة يعني أفراحك وأوجاعك
مصدر إلهامك وتألقك وإبداعك
نبراسك ونورك في عتمة الطريق
في عز غرقك هي سفينتك وشراعك
هي موهبتك وطاقتك وقدراتك
هي ونيسك في شدتك ومعاناتك
هي الروح اللي انت عايش بيها
هي حائط بطولاتك وإنجازاتك
الكتابة هي أقوي تعبير عن الذات
من خلال الشعر وروعة الأبيات
لوحة فنية بتوصف حياتك
إحساس صادق مش مجرد كلمات
وليه نسكت ونكبت مشاعرنا
ونستسلم ونخلي جراحنا تهزمنا
لازم نعبر عن اللي جوانا
لازم نبقي أقوي من مشاكلنا
وبإيه راح يفيد الكتمان
وليه تفضل مخنوق وتعبان
اكتب عشان تخفف أحمالك
عشان انت بني آدم عشان انت إنسان
اكتب وخلي لك بصمة
حول الألم لفرحة وبسمة
واجه المحن وخليك قدها
بإبداعك دايما أرقي وأسمي
