جيت من عندك مكسور الخاطربقلم: عمرو صلاح الغندقلي
جِيت مِنْ عِندَك مَكْسُور الخَاطِر،
وَأَنَا مِش شَاطِر
غَيْر فِي أَغَانِي
بَكْتبهَا لَك.
كَان مَالِي وَمَالَك؟
مَا كُنْتُش قَبْلَك عَايِش،
الظَّاهِر
غَيْر عَلشانَك.
كُنْت أَمِير،
وَسِيبْت كَتِير،
قصور وجناين
وكَام طَنّ حَرِير،
دِلْوَقْتِي
مِش عَارِف أَبْقَى
عَلَى بَاب قَلْبَك
حَتَّى غَفِير.
كُنْت بَصَحِّي اللّيْل
مِن نَوْمه،
جَايِز تِلْمَح
مَرَّ حَنِينِي
يِحْكِي لَك
قَمَرِي وَنُجُومه،
عَلَى الِلِّي ادَرَوش،
وَسَاب وَشّه
وَهْدُومه،
وَجَرَى وَرَا قَلْبَك حَافِي،
لكن
شُوكُك صَدّه.
آه لَو تَعْرَف
طَعْم الحُبّ،
وَنَهَر قَسَاوَته،
كُنْت هَتِيجِي تِشْرَب مِنّه،
وتِحْكِي حَلَاوَته.
لَكِن قَلْبَك
وَاخِد عَنْك
طِنّ قَسَاوَة.
فَاكِر يَعْنِي
مَع الأَيَّام
هَقْدَر أَنْسَى،
وَأَمْشِي أُهَاجِر،
وَأَفْضَل أُسَافِر
لِبِلَاد اللّه،
حَبَّة وَجَع أَخَد دَوَا،
تَرُوح الآه؟
منْتش عَارِف
طَعْم العِشْق
لَمَّا يِكَلْبِش جُوَّا القَلْب،
وَيِخْطَف مِنْك مَعْنَى الفَهْم،
وتِدِي بِرُوحِك زَي الشَّهْم.
يِنْزِف قَلْبَك
شَوْق مَمْزُوج بِالدَّم،
وَيِكْتُب اسْم حَبِيبَك
فِي سَمَا أَو أَرْض.
وتِشْكُر رَبّ
اداك القلب بيبنى فى حب
ولَمَّا يِجِيلَك،
عُمْر مَا عِينه تِغِيب
عَنْ عِينَك،
وتِلْمِس قَلْبه
بِلَمْسَة إِيدِك،
وتِجْبُر خَاطِره
لَمَّا يِجِيلَك.
